miércoles, 22 de diciembre de 2010

O BNG DE FORCAREI NO PARLAMENTO ESIXINDO A RETIRADA DA LEI DE AUGAS.


Unha delegación do BNG, encabezada polo portavoz nacional, Guillerme Vázquez, entregou esta mañá no rexistro do Parlamento de Galiza preto de 14.000 sinaturas en demanda da derrogación da Lei de Augas.

O portavoz nacional estivo acompañado pola secretaria de Organización, Montse Prado, a portavoz parlamentar de Medio Ambiente, Isabel Sánchez; Miguel Anxo Fernández Lores, alcalde de Pontevedra; Rubén Cela, candidato á alcaldía de Santiago; Adolfo Muíños, concelleiro do BNG e candidato á alcaldía de Rianxo; Matías da Torre, portavoz municipal de Silleda; Anabel Gulías, candidata á alcaldía de Forcarei; Raquel López Doce, portavoz municipal e tenenta de alcalde da Estrada; Secundino García, alcalde de San Sadurniño; Francisco da Silva, candidato á alcaldía das Pontes; Gonzalo Castro, portavoz municipal e candidato á alcaldía de Ordes; Xosé María Pérez, portavoz municipal de Frades; Fernando Herrero, portavoz en Soutomaior; Xoán Blanco, portavoz en Vila de Cruces, e Martiño Noriega, alcalde de Teo.
Na rolda de prensa posterior á entrega de sinaturas, Guillerme instou ao goberno da Xunta a “retirar a lei para que non quede dúbida ningunha”, logo de que o conselleiro Agustín Hernández asegurase que mentres el estivese no cargo non se ía facer efectivo o cobro do canon.
A única consecuencia da lei será que o prezo da factura aumentará de xeito considerábel para os consumidoresClamor social.

O líder nacionalista afirmou que “non ten sentido que o PP aprobe unha lei e logo fagan afirmacións do tenor de que mentres eu sexa conselleiro non se aplicará. Por que alcaldes do PP sacan bandos ou notas de prensa dicindo que están contra a lei de Augas? Como se pode estar en contra de algo que agora o PP di que non existe na realidade?”
“Existe un clamor social contra a Lei de Augas. Hai unha forma moi sinxela de resolver as inquedanzas da xente. Simplesmente o goberno ten que suprimir o canon. Con suprimilo, arreglan”, enfatizou.
Tal e como indicou o líder do BNG, “o que sucede é que o PP balbucea excusas de mal pagador porque acusa o golpe da campaña informativa que o BNG está a desenvolver por todos os concellos do país, con máis de duascentas charlas até este momento”.
“Nós seguiremos explicando o que supón esta lei”, continuou Guillerme, “e o PP ten unha ocasión de ouro de suprimir este canon inxusto” e indicou que “se trata dunha lei cun afán fondamente recadatorio que non pretende racionalizar o consumo nin ten en conta que o subministro público non existe en moitas zonas do país e a lei grava pozos privados e traídas veciñais”.

O BNG presentará no Parlamento iniciativas para derrogar a leiGuillerme lembrou que a única consecuencia evidente da lei será que “o prezo da factura aumentará de xeito considerábel para os consumidores e, pola contra, os grandes consumidores quedan como estaban”, tal e como apuntou o portavoz nacional, “a Xunta pretende cobrar pola auga dos pozos”.

O BNG de Forcarei , comezou o pasado inverno unha campaña informativa da lei que tivo varios actos en Meavía, Forcarei, Soutelo e Dúas Igrexas.

A intención do BNG é seguir informando aos veciños do concello e seguirá programando este tipo de actos.

ARTIGO SOBRE A POLÍTICA DE MEDIO RURAL

Novo artigo da responsábel local de Forcarei, sobre a política da consellaría de medio rural do PP editado no TERRA E TEMPO DIXITAL (http://www.terraetempo.com )

A Consellaría do Medio Rural: deixar pasar, deixar facer

ANABEL GULÍAS TORREIRO

A política de medio rural do PP está a chegar até límites insospeitados, non lle abonda con machacar as "estruturas intervencionistas" creadas nas anteriores lexislaturas, senón que opta pola pasividade no goberno como ferramenta para conseguir o seu obxectivo final: que o medio rural galego fique estancado para deleite das grandes multinacionais que esquilman e aproveitan a potencialidade do noso sector primario.

Non é complicado buscar feitos que retraten a política do PP en relación ao desenvolvemento rural e agrario deste país. Todo responde a súa lóxica de marxinar o agro e ao sector en xeral enterrando os intereses do país na residualidade a cambio de seu servilismo ás grandes firmas e ao Estado.

1. Os GDR´s: PASIVIDADE

No caso que máis coñezo no LEADER a parálise é tal que a día de hoxe seguimos sen ter un manual de procedemento nin programa informático que permita xestionar con maior axilidade as axudas. A subdirectora de AGADER, anunciou que por problemas orzamentarios alleos a súa vontade non íamos a contar cos fondos da anualidade de 2009, a súa falta de acción de goberno obrígalles a mentir xa que o único problema reside en pór a parte proporcional dos fondos propios da Xunta (21 de cada 100 euros) para cofinanciar os fondos FEADER e do Estado que están en reserva de crédito na contabilidade da Xunta.

2. O LIGAL: MANIPULACIÓN

O LIGAL é o laboratorio interprofesional galego de análise do leite, entidade que se encarga entre outras cuestións, do pagamento por calidade e control leiteiro, análise do leite e derivados... que deixa fóra da súa directiva a Leite Río ou Feiraco. Ou dito doutra xeito move ficha para seguir afortalando a súa política.

3. AS SOFOR: ESPECULACIÓN

Despois de moito tempo de parálise da consellaría, decide pór en marcha as SOFOR, unha nova figura societaria, que convertería as antigas UXFOR en sociedades limitadas, o que implicaría o aumento das obrigas tributarias, por non falar da obrigatoriedade da disposición de capital inicial necesario para a súa posta en marcha. Tamén permitirían a entrada de capital alleo nas entidades abríndolle a porta á posibilidade de especulación dos nosos montes.

4. PCA LEITEIRA: DE NOVO PASIVIDADE

A posición da consellaría ao respecto dos contratos homologados segue sendo a mesma: a pasividade, deixando as empresas que tomen a iniciativa en vez de intentar arbitrar e controlar a evolución dos prezos. O que fai a consellaría: eliminar a comisión de seguimento.

Dicía Dye, que "as políticas públicas son todo o que un goberno fai pero tamén todo o que non fai". Esta frase retrata á consellaría e obriga a considerar a pasividade como unha estratexia contra a que reaccionar. Neste caso é moito máis difícil facelo porque nós (como militancia) debemos ter argumentos e alternativas para combater este modelo de xestión, e implicarnos persoalmente no debate social destas cuestións.

A consellaría actúa segundo a premisa neoliberal do "laissez faire, laissez passer". Establece as canles para a desregularización e non intervén en determinados problemas que afectan aos intereses do sector. Acreditan na identificación do interese individual co social, xa que, segundo a lóxica liberal todo individuo busca lograr o maior rendemento e produtividade que logo, xa repercutirá na sociedade dalgún xeito. Ou buscando o símil e seguindo co exemplo do monte poderíamos dicir: que o monte é privado, e nós non nos queremos meter porque "supoñemos" que os individuos farán o mellor para eles e isto será o mellor para todos. Polo que se plantan eucaliptos para ter máis rendibilidade a curto prazo a costa dos nosos recursos, será positivo, non? (sobre todo para as pasteiras)

Quen hoxe afirma que os debates sobre a vixencia deste sistema económico están fóra de lugar ou que somentes afectan a cuestións empresariais ou industriais, é contestado pola propia realidade que lle debe obrigar a mirar de fronte a tomar partido para defender outro xeito de xestión.

Quen a ataca os posicionamentos ideolóxicos firmes como ferramenta de acción social e alternativa ao sistema, cualificándoos como rancios, ou doutra época é incapaz de facer unha análise clara do que acontece.

Quen di que esta consellaría non ten un posicionamento ideolóxico e que non debemos empregar certos termos nos debates, definitivamente está equivocado.

Por todo é necesario que nós artellemos e nos impliquemos nunha contestación sólida baseada no principios ideolóxicos que garantan o equilibrio social.
Para ler máis artigos publicados no terra e tempo dixital: http://www.terraetempo.org/perfil_colaborador.php?colaborador=139

ALTERNATIVAS PARA FORCAREI






O pasado día 12 de cembro estivo en Forcarei Alfredo Suárez Canal, ex conselleiro de medio rural co BNG na anterior lexislación.
Estivo acompañado da responsábel local , Anabel Gulías que falou do papel que pode desempeñar o BNG no concello , en todos os ámbitos. Entre outras cousas falou da importancia do sector agrogandeiro como liña estratÉxica do desenvolvemento municipal, da necesariedade do servizo de asesoramento técnico , ou da importancia de fomentar os plan de ordenamento forestal nos nosos montes ... así mesmo recordaron a importancia de fomentar actividades de lecer e culturais que revindiquen a nosa identidade.